कधी अशी, कधी तशी
तरीही माझी प्रियसखी तू !!
कधी हसतेस गोड
कधी गपगुमान खोड
कधी लावतेस ओढ
कधी वाटतेस कोडं !
कधी लाजतेस मधाळ
कधी वागतेस खट्याळ
कधी जुनाट कबाड
कधी स्वप्नांच घबाड !
कधी शिस्तीचा दबदबा
कधी हास्याचा धबधबा
कधी उत्साहाचा निर्झरा
कधी उदासीनतेचा पहारा !
कधी दिसतेस उदास
कधी भासतेस हताश
कधी राहतेस आनंदी
कधी नाचतेस स्वच्छंदी !
कधी मनात हिरमुसलेली
कधी स्वत:त गुरफटलेली
कधी पाकोळी कोमेजलेली
कधी गुलाबी मोहरलेली !
कधी भावूक हळवी
कधी नाजूक गोडवी
कधी खंबीर अचाट
कधी गंभीर अफाट !
तुझ्या श्वासात मी
माझ्या ध्यासात तू
तव भाव-ढंगात मी
मम प्रेम-रंगात तू
कधी मनी मोकळी
कधी घुमी अबोली
कधी अशी, कधी तशी
तरीही माझी प्रियसखी तू !!
-- संजय कुलकर्णी.
No comments:
Post a Comment