खरंच .. मी कुठं कविता लिहितो !!
सहजा सहजी सर्वांस कळणारा अर्थ
अगम्य अगाध शब्दात कुठं मांडतो ?
हळव्या मोरपिसी मन मोहक भावनांचा
अलंकारिक कृत्रिमपणे कुठं चिरफाड करतो ?
खरंच .. मी कुठं कविता लिहितो ..!!
सच्चे प्रसंग तुमच्या माझ्या जीवनातले
तुमच्याच शब्दात फक्त लिहित सुटतो ,
अंतरातील सुप्त आकांक्षा स्वप्नांस बिनधास्तपणे
तुमच्याच समोर मनमोकळे सांगत रहातो !
खरंच .. मी कुठं कविता लिहितो ..!!
व्याकरणास मी मुळीच ना जाणतो
भावना मात्र सच्च्या मी कथतो ,
ओढून ताणून गेयात्मक ना रचतो
सर्वांची मनस्वी उत्स्फूर्त दाद मिळवितो !
खरंच .. मी कुठं कविता लिहितो ..!!
-- संजय कुलकर्णी .
No comments:
Post a Comment